Ցանկանում եմ տեղեկացնել, որ իմ գլխավորած պատվիրակությունը սեպտեմբերի 29-ին մեկնելու է Փարիզ, որտեղ Ֆրանսիայի ավելի քան 50 քաղաքների ղեկավարների մասնակցությամբ, հոկտեմբերի 1-ին, տեղի է ունենալու ապակենտրոնացված համագործակցության հայ-ֆրանսիական խորհրդակցությունների նախապատրաստական ժողովը:
Հայ-ֆրանսիական խորհրդակցությունները նախատեսված են 2010-ի սեպտեմբերին, նպաստելու են մեր երկու երկրների միջև առկա կապերի սերտացմանը և հաստատելու են երկկողմ համագործակցության զարգացման ուղղությամբ տեղական ինքնակառավարման մարմիններին վերապահված դերը։
Իսկ հոկտեմբերի 2-ին ես մասնակցելու եմ ֆրանսախոս քաղաքների քաղաքապետÝերի միջազգային ասոցիացիայի/ AIMF/ 30-րդ գլխավոր վեհաժողովի բացման արարողությանը:Երևանը ֆրանկոֆոն քաղաքապետների միջազգային ասոցիացիային անդամակցել է 1998 թվականին, որից տասը տարի անց Հայաստանը դարձավ Ֆրանկոֆոնիայի միջազգային կազմակերպության ասոցացված անդամ։
Ֆրանսիայի մայրաքաղաքում նախատեսված է նաև իմ հանդիպումը Փարիզի քաղաքապետ Բերտրան Դելանոեի հետ, որի ընթացքում քննարկվելու են համագործակցության զարգացման և այդ նպատակով աշխատանքային խմբեր ստեղծելու հարցեր:

Մոսկովյան հանդիպումներից հետո, Յուրի Լուժկովի ուղեկցությամբ, սեպտեմբերի 17-ին ես մեկնեցի Ղազախստանի Ակտաու քաղաք, որտեղ տեղի էր ունենում Քաղաքների միջազգային ասամբլեայի համաժողովը:
Ակտաուում, ԱՊՀ երկրների տասնյակ մայրաքաղաքների ղեկավարների հետ քննարկման հիմնական թեման պետություն-մասնավոր հատված փոխհարաբերություններն էին, ինչպես նաև տեղական ենթակառուցվածքների զարգացման խնդիրները:
Իմ կարծիքով, ոլորտում իբրև հիմնական խթան կարող են ծառայել ներդրումների ներգրավմանը միտված օրենսդրության կատարելագործումն ու բարեփոխումների իրականացումը:
Քաղաքների միջազգային ասամբլեայի հիմնադիր համաձայնագիրը Երևանի քաղաքապետից բացի, ստորագրել են ԱՊՀ 9 երկրների 26 քաղաքների ղեկավարներ: Կազմակերպության նստավայրը Մոսկվան է, նախագահը` Մոսկվայի քաղաքապետը:

Մոսկովյան այցի երկրորդ օրը տեղի ունեցավ իմ հանդիպումը գործընկերոջս` Յուրի Լուժկովի հետ: Մեր երկրների միջև հաստատված տնտեսական և մշակութային կապերի դինամիկ զարգացման համատեքստում վերջին տարիներին առանձնակի տեղ են զբաղեցնում Մոսկվայի և Երևանի միջև հաստատված հարաբերությունները: Յուրի Լուժկովի հետ զրույցում, ընդգծելով, որ մեր գործընկերությունը հիմնված է փոխադարձ վստահության և ծրագրային համագործակցության վրա, ես նշեցի, որ
մեր խնդիրը ձեռքբերածը պահպանելն ու նոր, կոնկրետ ծրագրեր կյանքի կոչելն է: Վերջին տարիներին,հիրավի, շատ բան է արվել, սակայն զգալի ներուժ և լայն ասպարեզ կա դեռ ամենատարբեր բնագավառներում նոր ծրագրեր մշակելու և դրանք կյանքի կոչելու առումով: Ես և Յուրի Միխայլովիչը համակարծիք էինք, որ պետք է առանձնակի ուշադրություն դարձնել կրթական, մշակութային, սոցիալական ապահովության, ներդրումային, քաղաքային տնտեսության կառավարման տարբեր ոլորտներում փորձի փոխանակման, տարբեր բնագավառներում երկկողմ կապերի զարգացման հարցերին: Մոսկվան, աշխարհի խոշոր քաղաքական-մշակութային կենտրոն մայրաքաղաքներից մեկը լինելով, Յուրի Լուժկովի ղեկավարությամբ հսկայական փորձ է կուտակել քաղաքային տնտեսության կառավարման ասպարեզում: Երևանը, մայիսի 31-ից հետո նոր կարգավիճակ ստանալով, առաջին քայլերն է անում քաղաքի կառավարման ասպարեզում նոր տեխնոլոգիաների կիրառման առումով: Ես հուսով եմ, որ Մոսկվան և անձամբ Յուրի Միխայլովիչը, ըստ ամենայնի կօժանդակեն մեզ Մոսկվայի առաջավոր փորձը Երևանում ներդնելու գործում: Մեզ հատկապես հետաքրքրում է սոցիալական ծրագրերի իրականացման, համատիրությունների կայացման, կոմունալ բնակարանային, բարեկարգման ու կանաչապատման բնագավառներում մոսկովյան փորձը: Մեր երկու երկրների բարեկամությունն ու համագործակցությունը, ինչպես նաև պայքարը հանուն անկախության ու խաղաղության` բազմադարյա պատմություն ունի: Այստեղ, ի դեպ , զուտ խորհրդանշական առումով, ես նշեցի , որ մենք արդեն մշակել ենք Երևանի պատմական կենտրոններից մեկի` ռուս նշանավոր զորահրամանատար Պասկեվիչի անունը կրող բլուրի վերականգնման ծրագիրը: 19 – րդ դարասկզբին հենց այս բլրի վրա է տեղի ունեցել վճռական ճակատամարտը, որից հետո Արևելյան Հայաստանը միացավ Ռուսաստանին: Այստեղ նախատեսում ենք ամբողջ քաղաքաշինական համալիր ստեղծել: Կարծում եմ վերը նշված հանգամանքը կհետաքրքրի մոսկովյան ներդրողներին , ինչպես նաև Մոսկվայի կառավարությանը մեծամաշտաբ քաղաքաշինական այս նախագծում ներդրումային մասնակցություն ունենալու առումով: Ես և Յուրի Միխայլովիչը վստահություն ենք հայտնել, որ բոլոր բնագավառներում մեր երկկողմ համագործակցությունը կշարունակի զարգանալ և կյանքի կոչվել կառուցվածքային կոնկրետ ստորաբաժանումներում ` հանուն մեր երկու քաղաքների բարօրության, հանուն մեր քաղաքների ազգաբնակչության:

Մոսկովյան այցի առաջին օրը սկսվեց հայկական եկեղեցի այցելությամբ, որի ընթացքում ծանոթացա եկեղեցու նորոգման աշխատանքներին: Կարծում եմ, որ Երևանի քաղաքապետարանն ու Ռուսաստանի և Նոր Նախիջևանի թեմը պետք է այսուհետ էլ անեն հնարավորը, որ հայերը Մոսկվայում միշտ լինեն միասնական ու գործեն հանուն համայնքի բարգավաճման ու հայոց մայրաքաղաքի զարգացման:
Իսկ երեկոյան, ՌԴ-ում ՀՀ դեսպանատանն, ի պատիվ իմ մոսկովյան այցելության կազմակերպված ընդունելությանը, ես խորհրդանշական համարեցի, որ իբրև Երևանի առաջին ընտրված քաղաքապետ իմ պաշտոնական առաջին այցը կատարում եմ Մոսկվա:Ռուսաստանը մեր երկրի ռազմավարական գործընկերն է և մեր մայրաքաղաքների միջև կապերը հատուկ դերակատարություն ունեն ռուս-հայկական հարաբերությունների զարգացման ու ամրապնդման հարցում:Երևանի և Մոսկվայի հարաբերությունները կրում եմ լայնածաված ու դինամիկ բնույթ և մենք պարտավոր ենք շարունակել այդ համագործակցությունն ու առավել զարգացնել:Դրա համար կարևոր նախադրյալներից է ոչ միայն Մոսկվայի քաղաքապետ Յուրի Լուժկովի հետ մեր բարեկամությունը, որ սկսվել է դեռ այն ժամանակ, երբ ես ղեկավարում էի Կենտրոն համայնքն, այլ նաև Մոսկվայում ապրող, ստեղծագործող և աշխատող հայերը: Մոսկվայում է ապրում Սփյուռքի մեր ամենամեծ համայնքը և այն պետք է սնուցող օղակ լինի Հայաստանի և նրա սիրտը համարվող Երևանի համար: Անկեղծ ասեմ` մենք հպարտանում ենք, երբ ռուսական հեռուստաալիքներով դիտում ենք մեր հայրենակիցների` տաղանդավոր երիտասարդների մասնակցությամբ հաղորդումները: Հպարտանում ենք ու նաև ցանկանում, որ ռուսական հեռուստատեսություններում մեր ,,դեսպանները,, օգնեն, որ մեծ լսարան ունեցող հեռուստաալիքները պատմեմ ու հաղորդումներ պատրաստեն Երևանի մասին, դրանով խթանելով զբոսաշրջիկների հոսքը Հայաստանի մայրաքաղաք: Մենք ամեն ինչ անում ենք, որ հայկական շունչը զգացվի Մոսկվայում: Եվ այստեղ ես ուզում եմ հարգանքի խոսքեր ասել Մոսկվայում ապրող արվեստի ու գիտության հայ գործիչներին, ովքեր ռուսական մշակույթի սիրված դեմքերից են: Ցանկանում եմ նաև նշել Մոսկվայում իրենց գործունեությունը ծավալող ու հայ գործարարի պատիվը բարձր պահող բիզնեսմեններին: Մոսկվայի հետ մենք շարունակելու ենք գործակցել տարբեր բնագավառներում, այդ թվում սոցիալական ապահովության ու մատչելի բնակարանաշինության ոլորտներում, որտեղ Յուրի Լուժկովի ներդրած փորձը օգտակար կլինի մեզ համար: Աշխատանքներ տարվում են ու նաև մոսկվահայերը պետք է օգնեն, որ այդ աշխատանքներն արդյունավետ լինեն ու հնարավորին սեղմ ժամկետներում իրականություն դառնան: Նաև պետք է անենք հնարավորը, որ համագործակցության նոր հնարավորություններ ստեղծվեն քաղաքային տնտեսության բնագավառներում ու այլ ոլորտներում: Ես ուզում եմ նշել, որ Մոսկվայի կառավարությունը և անձամբ Յուրի Լուժկովը միշտ աջակցել են հայկական համայնքին ու Հայաստանի, մասնավորապես, Երևանի հետ կապված բոլոր ծրագրերին ու վստահ եմ, որ այդ աջակցությունը շարունակվելու է: Մոսկվայում ապրող հայերը պետք է օգտագործեն իրենց կապերն ու հնարավորությունները հանուն Երևանի զարգացման, քանզի որտեղ էլ ապրեն հայերը, պետք է առաջին հերթին մտածեն համայն հայության մայրաքաղաք ԵՐԵՎԱՆԻ մասին:

Բլոգի հարգելի այցելուներ, ուզում եմ տեղեկացնել, որ գործընկերոջս` Մոսկվայի քաղաքապետ Յուրի Լուժկովի հրավերով, իմ գլխավորած պատվիրակությունը, սեպտեմբերի 15-17-ը, պաշտոնական այցով գտնվելու է Ռուսաստանի Դաշնության մայրաքաղաքում: Որպես ընտրված քաղաքապետ` սա իմ առաջին պաշտոնական այցն է: Յուրի Լուժկովի հետ հանդիպմանը ես առանձնակի ուշադրություն եմ դարձվելու կրթական, մշակութային, սոցիալական ապահովության, ներդրումային, քաղաքային տնտեսության կառավարման տարբեր ոլորտներում փորձի փոխանակման, մի քանի բնագավառներում երկկողմ կապերի զարգացման հարցերին: Ցանկանում եմ նշել, որ Հայաստանի և Ռուսաստանի միջև հաստատված տնտեսական ու մշակութային կապերի դինամիկ զարգացման համատեքստում վերջին տարիներին առանձնակի տեղ են զբաղեցնում Մոսկվայի և Երևանի միջև հաստատված հարաբերությունները` գործընկերություն, որ հիմնված է փոխադարձ վստահության և ծրագրային համագործակցության վրա: Մոսկվան և Երևանը նաև ակտիվ համագործակցում են ԱՊՀ խոշոր քաղաքների և Մայրաքաղաքների միջազգային ասամբլեայի շրջանակներում: Ի դեպ, մոսկովյան բանակցություններից հետո , ես և Յուրի Միխայլովիչը մեկնելու ենք Ղազախստանի Ակտաու քաղաք, որտեղ մասնակցելու ենք Մայրաքաղաքների միջազգային ասամբլեայի համաժողովին: Սեպտեմբերի 17-ի երեկոյան իմ գլխավորած պատվիրակությունը վերադառնալու է Երևան: